Вратот ќе ви каже дали сте премногу болни за вежбање

Ако сте како најголемиот број луѓе, кога ќе започнете да кивате и да кашлате, сигурно ќе ја прекинете вообичаената рутина на вежбање, затоа што не сакате дополнително да си го загрозите здравјето. Но, оние кои што се одлучуваат да продолжат, иако не се чувствуваат најдобро, веројатно знаат нешто повеќе.

Експертите велат дека вежбањето во периодите кога се борите со инфекциите, може да биде корисно за организмот и побрзото опоравување. Во просек, тие што редовно вежбаат, двапати помалку се разболуваат од останатите луѓе; но сепак, постои момент кога и оние што се најрешителни мора да направат пауза. За да бидете сигурни дека се наоѓате во таква состојба, треба да го следите „Правилото на вратот“.

Правилото на вратот вели дека ако симптомите ги чувствувате единствено над вратот (затнат нос, воспалено грло, главоболка итн.), тогаш имате настинка и безбедно е да се продолжи секојдневната рутина.

Од друга страна, доколку покрај тие симптоми имате покачена телесна температура, треска, проблеми со белите дробови, малаксаност, болки низ целото тело, тоа може да укажува на грип, што пак значи дека е дојдено време за мала пауза. Вежбањето со треска е опасно, затоа што физичката активност може да ја забрза дехидрацијата, покрај останатите ризици.

Нормално, правилото на вратот не е 100% сигурно, па затоа бара и претпазливост. Симптомите може да не се до крај проширени, па дури и да се одлучите да продолжите со вежбањето, најумно е тоа да го правите половина од времето на вообичаено вежбање и со двапати смален интензитет.

Вежбањето кога сте болни бара дополнителна претпазливост. Ако се работи за настинка и се раздвижите, речиси веднаш ќе се почувствувате подобро. Но, доколку се работи за нешто посериозно, тогаш напорното вежбање може дополнително да го истошти имунолошкиот систем, па времето на боледување дополнително да се зголеми.

Исто така, кога вежбате, секогаш е важно да пиете многу течности, но кога сте болни, ова е особено важно. Дури и кога вежбате со смален интензитет, бидете сигурни дека ќе внесете барем 50% повеќе течности во себе.