Независно дали размислувате за списокот за пазарење, се потсетувате на расправијата што сте ја имале со партнерот претходната вечер или фантазирате за автомобилот или куќата кои ќе ги купите ако добиете на лотарија, огромна е веројатноста дека вашиот ум е постојано „во движење“. Сето ова размислување може да биде навистина заморно.

Тоа, исто така, ви оневозможува ментално да се опуштите доволно долго за да се фокусирате на нешто подолго од неколку секунди.

Медитацијата дава краток одмор од напорот за размислување.

(Зборот медитација доаѓа од санскритскиот збор medha кој може да се преведе како „мудро дејствување, да се направи мудрост“.)

Една неодамнешна студија во САД покажала дека мозокот не се исклучува за време на медитација, туку блокира одредени информации кои обично би ги пропуштил. Поконкретно, ги блокира информациите да стигнат до темениот дел од мозокот (париеталниот лобус), каде што се процесираат сензорните податоци за надворешниот свет.

Бројни студии ја имаат документирано моќта на медитацијата да влијае и врз преостанатиот дел од телото. Истражувачите откриле дека медитацијата може да предизвика промени кај имуниот систем и крвниот притисок кои може да имаат значајно влијание врз здравјето. Исто така, се покажало дека медитацијата го подобрува квалитетот на животот кај луѓето со најразлични здравствени проблеми, меѓу кои и рак на дојка, рак на простата, хронични болки и нарушувања.

Покрај сè, медитацијата има долга традиција како техника за поттикнување на спиритуалниот раст.

Луѓето кои ја користат медитацијата од спиритуални причини најчесто започнуваат со фокусирано длабоко дишење за да влезат во смирена, перцептивна состојба на умот. Потоа, додека се наоѓаат во медитативна состојба, се посветуваат на одредено доживување, проблем или спиритуална вистина.

Броење до 10

Комплетна медитативна сесија обично трае најмалку 20 минути. Во секој случај, вие можете делумно да го почувствувате искуството со практикување на мини-медитација. Таа се базира на старата изрека дека треба да изброите до 10 кога ќе се изнервирате. Се покажало дека ова навистина делува ако интензивно се фокусирате на броењето.

1. Направете неколку долги, длабоки вдишувања и издишувања за да се релаксирате. Фокусирајте се на воздухот кој го вдишувате и издишувате.
2. Визуализирајте се себеси во лифт на 10-катна зграда. Длабоко вдишете. Потоа тивко кажете го бројот 10 како што издишувате.
3. Продолжете со броење од 10 до 1 на овој начин со секое вдишување и издишување, додека ментално се симнувате со лифт од најгорниот кат до приземјето.